FINALMENTE ISTE BLOG

 

Imagine ab www.expandgh.com

Le secunde decennio de iste seculo esseva, pro me, plen de activitate linguistic. Io creava non minus que quatro blogs: duo in ido – La blua plumo (2015) e Linguala noti (2016), ambes ancora active – un in latino – Vox lusitanica (ubi io publicava solmente le articulo inaugural in 2016!) – e un in esperanto – Parenteze (septe articulos, longe, in 2017, e un silentio absolute desde alora).

 

Tamen io creava nulle blog in interlingua, ben que tunc io sapeva le lingua e lo practicava jam desde le initio del prime decennio (vide hic mi articulo “Mi prime contacto con interlingua”, publicate in Panorama in 2005). Proque iste manco? Io vermente non sape le motivo exacte. Comocunque, io sempre ha sentite – e sperate – que, un belle die, io certemente supplerea le lacuna. Io crede que un tal die ha finalmente venite. Malgrado mi chronic manco de tempore libere – e fines de septimana, e vacantias... – e in despecto de tote le difficultates – sempre crescente, guai a me! – pro sustentar un familia de quatro personas in un pais objectivemente paupere que, non obstante, ama ostentar ricchessa, io pensa que io non debe – o mesmo non pote – ajornar plus longemente un tal decision.

 

Con 61 annos, io senti que interlingua essera probabilemente mi “auxilingua” le plus importante e le plus frequente in le ultime tertio de mi vita terren. Un lingua matur pro un homine matur. Ergo, io spera que le creation de iste blog – e de un blog parallel, Notas linguistic, dedicate integremente a questiones linguistic de interlingua – essera un instrumento adequate pro publicar le textos resultante de mi impressiones, cogitationes, reflexiones, meditationes, cerebrationes, o mesmo elucubrationes.

 

Il va sin dicer que, in le momento presente, il es multo plus facile scriber in interlingua, in comparation con le tempore in que io comenciava interessar me pro iste lingua e practicar lo. Le digitalisation del impressionante Dictionario Encyclopedic de Interlingua de Toma Macovei, le travalios lexicographic de Josu Lavin e de mi compatriota Carlos Soreto – que culminava in le publication del magnific Thesauro International (2021) – e le utilissime compulsator de Ruud Harmsen, que permitte compulsar e consultar non minus que tredece (o dece-tres) dictionarios de interlingua – inter altere materiales lexical e didactic que io, pro rationes de brevitate, non va mentionar hic – rende multo plus commode e fructifere le mission e labor de qualcunque philologo, lexicographo, litterato, traductor, scriptor, o simple interessato qui vole studiar, explorar o usar le lingua in su campo de action.

 

Io dunque es fortunate e ha le deber de usar iste utensile tanto inricchite, appurate e raffinate. Iste blog – e anque le altere jam mentionate – essera un medio preferential pro executar un tal mission. Io intende usar hic un interlingua ric e variate, ma anque equilibrate – ni troppo latinesc, ni troppo “modernista” – obviemente secundo mi inclinationes e predispositiones, ma sempre un interlingua classic e – io spera – correcte, elegante e agradabile.